Winnie-la-Pu

4.7 MB·Ido

by  Brian E. Drake

WINNIE-LA-PU
DA
A. A. MILNE
ILUSTRURI DA
E. H. SHEPARD
Winnie-the-Pooh esis unesme publisita dum 1926 en
Anglia da Methuen.
Ica tradukuro
Creative Commons 2022 by Brian E. Drake
Attribution-NonCommercial-ShareAlike 4.0
Unported International
The Oxford Rationalist
56 Albany Street
Oxford, NY 13830 USA
[phone]
[email protected]
WINNIE-LA-PU
DA
A. A. MILNE

ILUSTRURI DA
E. H. SHEPARD
Tradukita da Brian E. Drake

Ad Elu
Manuo an manuo ni venas
Christopher Robin e me
Por pozar ica libro adsur tua gremio.
Dicez ke tu es surprizita!
Dicez ke tu prizas ol!
Dicez ke ol esas precize to quon tu deziris!
Pro ke ol esas la tua—
Pro ke ni amas tu.

Introdukto
Se tu lektabis altra libro pri Christopher
Robin, tu forsan rimemoras ke olim lu havis
cigno (o la cigno havis Christopher Robin,
me ne savas qua esas justa) e ke lu nomizis
ica cigno “Pu”. To esis longe ante nun, e
dicante adio, ni forportis la nomo kun ni,
pro ke ni ne supozis ke la cigno ankore
deziras ol. Nu, kande Edward Urso dicis ke
lu volas havar sua propra ecitanta nomo,
Christopher Robin quik dicis, sen pensar, ke
lu esas Winnie-la-Pu. E lu esis. Do, pro ke
me explikis la Pu-parto, me nun explikos
l’altra parto.
On ne darfas restar longe en London sen
irar al Zoologiala Gardeno. Uli komencas la
Zoo ye la komenco, nomita ENIREYO, e
preterpasas tam rapide kam posible omna
kajo til ke li atingas to quo nomesas
EKIREYO, ma la maxim agreabla homi
direte iras a sua maxim preferata animalo,
ed ibe restas. Do, kande Christopher Robin
iras a la Zoo, lu iras a la loko ube esas la
7
Polal Ursi e lu susuras ulo a la triesma
gardisto de sinistre, e pordi klefapertesas, e
ni vagas tra l’obskura paseyi ed acensas
eskarpa eskaleri, til ke ni tandem venas a
specala kajo, e la kajo apertesas, ed ek ol
kuras ulo bruna e furoza, e kun felica krio,
“Ho, Urso!” Christopher Robin hastas a lua
embraco. La nomo di ca urso esas Winnie,
qua montras quante bona nomo ol esas por
ursi, ma esas stranja ke ni ne povas
rimemorar, ka Winnie nomizesas pro Pu, o
ka Pu nomizesas pro Winnie. Ni olim savis,
ya, ma ni obliviis.…
Me skribabis til ica punto kande Porketo
adsupre regardis e dicis per sua stridatra
voco, “Quo pri Me?” “Mea kara Porketo,”
me dicis, “la tota libro esas pri tu.” “Do, ol
esas pri Pu,” lu stridetis. Tu komprenas. Lu
esas jaluza pro ke lu opinionas ke Pu havas
sua propra Grand Introdukto. Pu esas la
preferata, komprenende, on ne povas negar
lo, ma Porketo traktas multa kozi quin Pu
ne remarkas; pro ke on ne povas duktar Pu
a la skolo sen ke omnu remarkez, ma
Porketo esas tante mikra ke lu glitas aden
posho, ube esas tre komfortiganta sentar lu
kande on ne esas tote certa ke la duoplo di
sep esas dek-e-du o duadek-e-du. Ulfoye lu
ekglitas e forte regardas aden l’inkuyo, e
8
talmaniere lu ganis plu multa eduko kam
Pu, ma Pu ne regretas. Uli havas cerebro, ed
uli ne havas cerebro, lu dicas, yen lo.
E nun omna altri dicas, “Quo pri Ni?”
Do forsan esas maxim bona cesar skribar
Introdukti ed enirar la libro.
A. A. M.
9