Untitled - Addi - UPV/EHU

334 Pages·2015·18.85 MB·English

TESIS DOCTORAL
Análisis y optimización del comportamiento
mecánico de implantes dentales mediante
simulación numérica
Ugutz Garitaonaindia Antsoategi
Donostia – San Sebastián, octubre 2015
(cc) 2015 Ugutz Garitaonaindia Antsoategi (CC BY-ND 4.0)

Amai eta aitxei, emundako danagatik
Anaiei, elkarrekin bizitako momentuengatik
Oihanai, bidelagun ezin hobie izetiegatik
Haritz eta Katixai, dimentsio berri bat erakustiegatik

ESKER ONAK
Lehenik eta behin nire esker ona adierazi nahi diot tesi honen zuzendaria izan den
José Luis Alcaraz Tafallari. Euskal Herriko Unibertsitateko (UPV/EHU) Ingeniaritza
Mekanikoa Sailean, Biomekanikaren arlo interesgarrian tesi hau egiteko aukera
emateagatik. Bere laguntza eta iradokizun preziatuengatik.
Mila esker Gasteizko Ingeniaritza Unibertsitate Eskolako (UPV/EHU) Ingeniaritza
Mekanikoa Saileko lankideei, lan hau egiten hasteko bultzada emateagatik eta
elkarrekin bizi izan ditugun esperientziengatik.
Nire esker ona adierazi nahi diot baita ere Leioako Campusean dagoen Medikuntza
eta Odontologia Fakultateko (UPV/EHU) Estomatologia Saileko irakaslea den Juan
Antonio San Martín Martínezeri, bere aholku eta laguntzagatik.
Egunerokoan laguntzeko gertu ditudan Donostiako Unibertsitate Eskola
Politeknikoko (UPV/EHU) Ingeniaritza Mekanikoa Saileko lankideei, eta bereziki
Faustino Mujika irakasleari, artikuluak argitaratzeko prozesuan emandako
laguntzagatik, eskerrik asko.
Createch Medical S.L. enpresako Nahia Golzarri eta Antxoka Urzainkiri baita ere
eskerrak eman nahi dizkiet, bertan egiten duten lanaren inguruko azalpenak
emateagatik, nigan izan duten konfidantzagatik eta tesi honetarako baliagarriak izan
zaizkidan inplanteen gaineko egituren geometriak uzteagatik.
Eskerrik asko baita ere Bilboko Ingeniaritza Goi Eskola Teknikoko (UPV/EHU)
Joseba Albizuri irakasleari. Donostia Unibertsitate Ospitalean, Aho eta Aurpegi-
Masailetako Kirurgiako espezialista den Pedro Martínez Seijas medikuarekin
harremanetan jartzeagatik, eta azken honi, lan honetarako egin dituen ekarpenengatik.
LABURPENA
Ikerketa lan honen helburua; hortz inplanteen, hortz inplanteen gaineko egituren eta
ortodontziako euskarri gisa zein aho eta aurpegi-masailetako kirurgian erabiltzen
diren mikroinplanteen portaera biomekanikoaren ezagutzan sakontzea da.
Honetarako, elementu finituen modeloen bidez, aztertutako parametro desberdinen
eragina ikertu da simulazio numerikoak erabiliz.
Hortz inplanteei dagokienez, tentsioak eta deformazioak sortzerako orduan, beraien
diseinuan kontuan izan behar diren parametroak duten eragina aztertu da: diametroa,
luzera, inplantearen kanpoaldeko hari-mota (triangeluarra edo karratua), mikroharia
inplantearen eremu zerbikalean, inplantearen kanpoaldeko harian erdiko tartea laua
izatea, hezurraren modelizazioa inplantearen inguruan, eta abar. Honetarako, bi eta
hiru dimentsiotako elementu finituen modeloak erabili dira. Inplantearen lotze eta
funtzionamendu egoerak aztertu dira eta diseinuko parametroen eragina deskribatu
egin da.
Hortz inplanteen gaineko egituren kasuan, lan honetan hauen portaera mekanikoa
ebaluatzeko metodo berri bat proposatu da. Egitura hauek jasan behar dituzten
indarrak kontuan izanda, egiturek hortz inplanteentzat dituzten zuloetan hauek
transmititzen duten zurruntasuna simulatzea lortu da. Modu honetan, egituren
portaera egoera errealago batean aztertzea lortu da; tentsioak, deformazioak eta
egiturek hortz inplanteei transmititzen dieten indarrak ezagutuz.
Azkenik, nahiz eta ortodontziako zein aho eta aurpegi-masaileko kirurgian
mikroinplanteen erabilera oso hedatua egon, ez da zehatz-mehatz ezagutzen hauen
portaera lotura monokortikala edo bikortikala denean. Hiru dimentsiotako elementu
finituen modeloak erabiliz, lan honetan; mikroinplanteen materiala (titanioa edo
erabilpen medikoa duen altzairu herdoilgaitza), indarraren inklinazio angelua eta
lotura motaren arabera, mikroimplante eta inguruko hezurraren portaera ezagutzea
lortu da.