Prome radio emisora na Savaneta

0.14 MB·Papiamento

by  Kock, Adolf (Dufi)

Prome Radio Emisora na Savaneta

E prome radio emisora na
Savaneta tabata Radio Caruso
Booy di Sr. Hubert Erquilles
Antonio Booy, miho conoci como
Caruso. Sr. Booy a nace na Corsou
dia 7 di november 1934 y ta casa
cu Sira Booy.

Caruso tabata un persona hopi
conoci den radiodifusion na Aruba
y Corsou y tambe un di e
pioneronan di e prome radio
emisora riba Frequencia Modula
(FM) na Aruba. Su carera tabata
pa hopi aña den radiodifusion na
Radio Hoyer na Corsou. Despues
Caruso a muda pa Aruba y a traha
como gerente di e stacion na Radio
Antiyana (AM), awendia conoci
como Radio 1270.
Caruso Booy den su studio na Bruynewijk

Despues Caruso a dicidi di move cu e tecnologia pa por realisa su soño di semper:
su propio radio emisora. Cu hopi esfuerso y perseverancia Caruso, hunto cu su
señora Sira, a logra realisa e meta di tin un propio emisora riba banda FM. Esaki a
bira Radio Caruso Booy cu e lema “E Baranca di Diamanta”. E prome transmision
tabata dia 19 di december 1978 for di e studionan instala na Boulevard Center
(awendia Renaissance Hotel). Despues e studio a move pa residencia di Caruso na
Generaal Majoor de Bruynewijk 49 na Savaneta.

Radio Caruso Booy a bira un emisora hopi stima den pueblo na Aruba, Antiyas y
bisindario pa su programa hopi varia y alegre pa tur hende. Caruso mes tabata
activo den entre otro Aruba Press Club bou direccion di Sr. Jos van der Schoot y
tambe den clubnan deportivo manera Essolito y varios organisacion y a duna gran
aporte na comunidad di Aruba cu diferente programa educativo, cultural, religioso y
musical.

Entre aña 1989 y 1990, Caruso a sufri un kebrante di salud y dia 18 di october 1990
den un hospital na Corsou, el a bay sosega. E fayecimento aki a conmove henter
Aruba y Antiyas cu e perdida di un di e pioneronan den radiodifusion na Aruba.
Caruso su entiero a tuma luga na Aruba. E ta dera den santana di Savaneta.

Despues di e fayecimento di Caruso, su señora Sira, a tuma e maneho di e radio
over, pero pa motibo di un conflicto entre e emisora y gobierno, lastimanente e
emisora a cera dia 14 di maart 2007 cu e speransa cu un dia lo e por habri bek.

Dufi Kock
Escritor y Historiado
Savaneta 125-F
Tel: [phone]
Lid in de Orde van Oranje Nassau 2006